Fakte Interesante – Çfarë ndodhi 50 vite më parë?

Historia është plot me data dhe ngjarje të rëndësishme që ndërtuan civilizimin modern. Ndikimi i plotë i ngjarjeve të tilla kërkon kohë për t’u vërejtur dhe vlerësuar.

Shpesh duhen vite dhe dekada, kështu që le të shohim disa ngjarje që ndryshuan historinë 50 vjet më parë, dhe kishin pasoja të mëdha përparimtare në shoqërinë bashkëkohore.

Ulja e Parë e Njeriut në Hënë

Apollo 11 filloi udhëtimin e tij historik për në Hënë më 16 korrik 1969. Anija kozmike arriti në destinacionin e saj më 21 korrik, dhe Neil Armstrong u bë personi i parë që u fut në sipërfaqen hënore, me Buzz Aldrin që e ndoqi atë rreth 20 minuta më vonë.

Misioni shënoi fillimin e zhvillimit të shpejtë të studimit të hapësirës, ​​që solli njohuri të jashtëzakonshme në lidhje me galaktikën tonë dhe universin në përgjithësi.

Disa dekada më vonë Stacioni Ndërkombëtar i Hapësirës u krijua si një përpjekje e përbashkët globale e njerëzimit për të patur prezencë të vazhdueshme shkencore në hapësirën e jashtme.

Interneti

Ka pasur një debat të gjatë në lidhje me kohën kur lindi "Interneti", me shumë udhëheqës të teknologjisë që citojnë 7 Prillin e 1969 si ditëlindjen zyrtare të internetit. Kjo është dita kur u publikua Kërkesa e parë Zyrtare për Komente, ose RFC (Request for Official Comments), e cila përfshinte hulumtime, propozime dhe ide për krijimin e teknologjisë së vërtetë të internetit.

Tani, dekada më vonë, interneti është bërë një pjesë integrale e jetës sonë të përditshme, duke na mundësuar që të lidhemi lehtësisht me njerëzit në të gjithë globin.

Zhvillimi i vrullshëm teknologjik

Thuhet se ndryshimet e mëdha nxiten nga përpjekje dhe përkushtime të mëdha. Në 1969 Samsung Electronics u krijua në Suwon, Kore e Jugut. Produktet e saj të hershme ishin pajisje elektronike dhe elektrikoshtëpiake, duke përfshirë televizorë, makina llogaritëse, frigoriferë, kondicionerë dhe makina larëse.

Në vitin 1988 kompania lançoi telefonin e parë celular, dhe në vitin 2010 u bë kompania numër një në botë e telefonave celularë, duke drejtuar zhvillimin e industrisë me teknologji të cilësisë më të lartë dhe kërkime shkencore që vërtet ndryshojnë mënyrën se si ne jetojmë dhe komunikojmë.

Mikroprocesori i parë

Në 1969, Lee Boysel projektoi mikroprocesorin e parë, i cili do t’i hapte rrugë dekadave të tëra të kërkimeve që rezultuan në revolucionin dixhital të fundit të shekullit të 20-të.

Kompjuterët personalë u bënë një pajisje e domosdoshme shtëpiake dhe së bashku me internetin hapën rrugën për një epokë të re të realitetit të dixhitalizuar.

Ajo që ne tani njohim si teknologji kompjuterike, me të gjitha pajisjet e avancuara, filloi nga ky çip i vogël 8-bit 50 vjet më parë.