Në pritje të titullit kampion, Partizanit i duhet matematikisht të sigurojë vendin e parë, kur mbeten edhe pesë javë nga mbyllja e garës. Ndeshja e radhës në Vlorë ndaj Flamurtarit për të besuarit e trajnerit Skënder Gega, ka rëndësinë e saj, pasi një fitore e mundshme do të realizonte ëndrrën e të kuqve që titullin ta festonin në një ndeshje të madhe derbi, si ajo kundër Tiranës një javë më vonë.
Diferenca aktuale prej 10 pikësh, nëse Partizani merr maksimumin në Vlorë do të mbetet e pandryshuar me vendin e dytë, Kukësin, duke qenë se verilindorët këtë javë sigurojnë tre pikët në tavolinë, në përballjen e planifikuar me Kamzën. Llogaritë janë të qarta: Partizanit i duhen dy fitore radhazi, për t’u shpallur matematikisht kampion.
Por llogaritë e Partizanit ia prish ambicia e madhe e Flamurtarit, për të ruajtur me çdo kusht vendin e tretë. Të gjendur në një situatë të vështirë prej muajit janar, pjesa e mbetur e lojtarëve të Flamurtarit kanë mbajtur mbi supe krizën financiare, duke bërë mrekullinë, atë të ngjitjes në vend të tretë.
Futbollistët vlonjate kanë marrë premtimin se shlyerja e detyrimeve të prapambetura do të realizohet në rast të një objektivi të tillë, sikurse do të ketë edhe një plan ambicioz për Europën. Pikërisht përballë Flamurtarit, që kërkon medoemos për të prerë një biletë në Europa League, Partizani luan me fatet e këtij ekipi, pas një sezoni të vështirë.
Kategoria Superiore
Java e 32-të/4 maj (ora 15:00)
Flamurtari - Partizani
Laçi - Kastrioti
Tirana - Skënderbeu
Teuta - Luftëtari
Kamza - Kukësi
Klasifikimi
Partizani 62
Kukësi 52
Flamurtari 48
Teuta 47
Skënderbeu 46
Laçi 45
Luftëtari 39
Tirana 37
Kastrioti 34
Kamza 17