Kryebashkiakut të Vlorës i digjet makina gjatë natës

Vlora është e njohur në vendin tonë për ngjarje të shumta të këtij lloji, teksa mëngjesi e gjen shpesh qytetin bregdetar me makina të djegura.

Mëngjesin e kësaj të enjteje është djegur një automjet në pronësi të Bashkisë së Vlorës, i cili përdorej edhe nga krye-bashkiaku Dritan Leli.

Ngjarja ndodhi rreth orës 04:26 në lagjen “Lef Sallata”, ku mjeti tip "Range Rover" ka qenë i parkuar.

Sipas policisë, nga flakët është djegur edhe një automjet tjetër tip” Ford”, parkuar në afërsi.

Drejtuesi i mjetit “Range Rover”, shtetasi E.T (shoferi i Kryetarit të Bashkisë) e kishte parkuar mjetin pranë pallatit ku banon. Ndërsa mjeti tjetër tip “Ford” është në pronësi të shtetasit B.A.

Flakët e zjarrit kanë dëmtuar plotësisht të dy automjetet.

Policia po heton ngjarjen për të zbuluar autorët. /Afp.al/