Fermerët shqiptarë të këtyre zonave duket se nuk po kënaqen këtë vit me çmimin që po shitet shalqiri.
Ata thonë se çmimi nuk mbulon kostot e prodhimit. Sot ata e shesin një kilogram shalqi nga 5 deri në 10 lekë, shifër kjo më e ulëta në 3 vjet.
“Sot shalqiri po shitet me 100 lekë të vjetra. Nuk na ndihmon shteti, sikur edhe me një subvencion të vogël”, thotë një fermer.
“Ne nuk marrim as gjysmën e lekëve që kemi hedhur në tokë, e jo më të marrim fitimin. Jemi të detyruar që të dalim ne xhade e të shesim një kokërr shalqi e të ushqehemi se kemi borxhe nëpër dyqane”, ankohet një tjetër fermer.
Për këtë situatë ka fermerë të cilët akuzojnë pikat e grumbullimit që sipas tyre vendosin çmimin sipas interesit, në dëm të prodhuesve. Tregtarët e sheshin kilogramin e shalqirit disa herë më tepër se prodhuesi dhe fitojnë shumë me tepër se ata që kanë punuar pwr muaj të tërë.
Edhe pse çmimi është i ulët, fermerët janë të detyruar ta shesin sepse koha e pjekjes po kalon, dhe nëse nuk shitet dëmi do të jetë akoma më i madh.