Basha: Ajo që ndodhi në 30 Qershor nuk ka ndodhur në 3 dekada! Mesazhi i shumicës refuzuese i qartë: Rama ik!

Kryetari i Partisë Demokratike, Lulzim Basha ishte sot me struktura të PD në Urën Vajgurore dhe Kuçovë.

Ai tha se ajo që ka ndodhur në 30 Qershor, nuk ka ndodhur kurrë në 3 dekada dhe se sipas tij, braktisja dhe refuzimi i Edi Ramës ka qenë në proporcione masive.

Për Bashën, askush nuk është refuzuar si Edi Rama dhe regjimi i tij.

“Në këtë refuzim gjejnë shprehje disa prej problemeve kryesore, për të cilat jemi angazhuar në këtë aksion të paprecedentë politik”, - tha z.Basha duke i renditur më tej:

1. Vetëdijësim i shqiptarëve se 30 qershori ishte ditë për oligarkët, banditët, për shërbëtorët e Edi Ramës, por jo një ditë për qytetarët e zakonshëm. Ramën e braktisi edhe baza socialiste, sepse nuk i shërbente as PS ky proces.
2. Braktisja dhe refuzimi i Edi Ramës erdhi për shkak të gjendjes së mjeruar ekonomike, thellimit të varfërimit të shqiptarëve.
3. Roli përcaktues i opozitës, aksioni politik. Pa vendimet e mëdha që morëm, duke nisur me djegien e mandatave, as vetëdijësimi i shqiptarëve nuk do të rritej, as kurajo nuk do të ishte në këto nivele. Sepse më 30 qershor është bërë protesta më e madhe e të gjithë protestave. Nuk u bë në një shesh, por u bë në të gjithë Shqipërinë njëkohësisht.

E vetmja votë e pastër e 30 qershorit është vota e atyre që nuk dolën. Mesazhi është ai që është bërë refren deri edhe për fëmijët: Rama ik.

Për kreun opozitar, raporti i ODIHR është vula më e zezë që kanë marrë ndonjëherë zgjedhjet në Shqipëri dhe Ballkan.

“30 qershori nuk mund të prodhojë asnjë pasojë juridike përveçse ndaj atyre që kanë shpërdorur burimet shtetërore në një proces farsë, duke nisur nga paratë që kanë hedhur në një proces të paligjshëm”, - tha z.Basha.

Sipas tij, po të kishim një prokuror të ndershëm dhe me integritet, sot, të gjithë këta persona, duke nisur me Edi Ramën, me KQZ, me ministritë e përfshira, do të ishin nën hetim për shpërdorim detyre dhe shpërdorim financiar”.