Stefoska tha se deputetët nga VMRO-DPMNE nuk ofruan ndonjë alternativë tjetër në rast se Marrëveshja e Prespës dështon.
Kryeministri Zoran Zaev, ofroi një lloj pajtimi në këmbim të votimit të ndryshimeve kushtetuese.
“Të falim dhe të pajtohemi”, tha ai.
Oferta e tij nënkuptohet si amnisti lidhur me ngjarjet e dhunshme të 27 prillit, 2017 në parlament, ku Zaev ishte ndër më të dëmtuarit bashkë me Ziadin Selën e Aleancës për Shqiptarët.
Në komentet e tyre në Parlament, deputetët opozitarë kritikuan mungesën e bashkëpunimit dhe konsultimeve nga ana e pushtetit para nënshkrimit të marrëveshjes së Prespës me Greqinë fqinje lidhur me ndryshimin e emrit të Maqedonisë.
Debati në fazën e parë në seancën plenare në Kuvend, mund të zgjasë 10 ditë.
Ndërkaq kreu i diplomacisë greke Nikos Kotzias i ka çuar një mesazh Shkupit nga samiti i ministrave të Jashtëm në Luksemburg.
“Pa miratimin e marrëveshjes së Prespës nuk do të ketë integrim në NATO dhe BE”, ka deklaruar Nikos Kotzias.
Tre ditë më parë, edhe kryeministri Tsipras deklaroi se alternativa e vetme që Shkupi të integrohet në NATO dhe BE është që Parlamenti i Maqedonisë të votojë këtë marrëveshje.