Vonesa e mosdeklarimit publik të të hyrave fiskale mund të shpjegohet me faktin se Ministria e Financave nuk ka mundur të realizojë detyrimin ligjor të grumbullimit të tyre sipas planifikimit.
Në fund të muajit korrik buxhetit i mungojnë më shumë se 188 milionë lekë të rinj, që vijnë nga mosarkëtimi i të ardhurave.
Gropën më të madhe në buxhet, sipas një vëzhgimi të Televizionit Publik Shqiptar, e përbën edhe në këtë rast tatimi mbi vlerën e shtuar, pra taksa e konsumit e cila shënon rreth 63 milion lekë të rinj më pak se planifikimi.
Pa realizim janë edhe tatimi mbi fitimin dhe akciza, taksa që paguajnë mallra e ashtuquajtur të fortë, si birra, karburantet, kafeja dhe parfumet. Duket se Ministria e Financave e ka parandjerë këtë performancë të dobët në grumbullimin e të ardhurave, përderisa ka rishikuar buxhetin e vitit 2017, ku tatimi mbi vlerën e shtuar ulet me rreth 3 miliardë lekë.
Të hyrat fiskale të gjashtëmujorit të dytë, do të jenë më të vështira për t’u realizuar edhe për faktin se ka qenë vetë dikasteri i financave që ka planifikuar një peshë me të lehtë të agjencive shtetërore të tatim taksave në 6 mujorin e parë, për ta rënduar atë në gjysmën e dytë të vitit.
Grafiku i shpërndarjes së të hyrave fiskale për vitin 2017 e shpjegon më së miri këtë.
Ministria e Financave ende nuk e ka publikuar tabelën e plotë të treguesve të konsoliduar fiskalë për periudhën janar-korrik 2017.
Ndërkohë që në buxhet mungojnë të ardhurat nga thatësira e tezgjatur e kësaj vere, Shqipëria është detyruar të importojë mbi 80 për qind të energjisë elektrike, duke shtuar borxhin e jashtëm.
Koorporata elektro-energjitike shqiptare ka çelur tenderin për importin e energjisë elektrike, pak ditë pasi banka botërore i autorizoi përdorimin e kredisë 22.4 milionë euro për blerje të energjisë.
Kompanitë e interesuara kanë afat deri në 29 gusht për të paraqitur ofertat e tyre. Referuar kërkesë-ofertës zyrtare, KESH do të blejë 129 mijë megavat energji për gjithë muajin shtator, duke lehtësuar disi operatorin e shpërndarjes së energjisë, i cili duhet të sigurojë vetëm një pjesë të importit për shtatorin, në mënyrë që të garantohet tërësisht konsumi në vend.
Edhe për muajin shtator sasia e blerjes së energjisë elektrike do të jetë e lartë, thuajse e njëjtë me gushtin. Ndërkohë për dy muajt e verës, korrikun dhe gushtin, OSHEE ka paguar 53.6 milionë euro në total për blerjen e energjisë elektrike.
Si pasojë e rritjes së konsumit të energjisë nga temperaturat e larta OSHEE u detyrua të hapte një tender të dytë për gushtin me vlerë 1.6 milionë euro për të siguruar energjinë e plotë deri në fund të këtij muaji. Ndërkohë, situata në kaskadën e lumit Drin vijon të mbetet kritike nga thatësira e tejzgjatur.
/a.m/
