Për ne shqiptarët kjo është eksperienca më e largët. Diktatura e egër komuniste na ‘ruajti’ edhe nga njohuritë se si të ha droga. Kombin dhe shtetin tonë- komb, e kishte rrënuar diktatura, izolimi, lufta e klasave dhe më në fund varfëria ekstreme. Droga ishte ende larg...
Tani kemi ardhur te pika ‘drogë’. 2016 ishte viti i parë kur vendi ynë u vu në hartën botërore të rrezikut nga droga. Të gjitha sipërfaqet e kultivueshme me drogë, janë mbjellë me bimën ‘wanted’ në gjithë botën. Jo vetëm është mbjellë sipërfaqja më e madhe e tokës që mund të quhet ‘nën kulturë’, por edhe ‘nuk dihet’ ku ka e ku nuk ka drogë; nuk dihet sa ton u mbollën dhe sa u fabrikuan; nuk është dëshmuar sa ton dhe ku është asgjësuar. Provat e fundit po tregojnë se droga mund të mos jetë asgjësuar kurrë; lënda mund të ketë mbushur tunelet dhe trafikohet drejt Perëndimit nën kujdesin e qeverisë...
Tani ndodhemi në këtë pikë: Shteti ka rënë në kaos. Ka ardhur koha e zgjedhjeve parlamentare, por zgjedhje nuk do të ketë; ka rënë institucioni i zgjedhjeve. Sot mbaroi edhe afati kushtetues i Presidentit të republikës; asnjë kandidat nuk paraqitet në dy seancat e deritanishme parlamentare. Drejtësia nuk funksionon për shkak se nuk është arritur “Vettingu”. Avokatit të Popullit i ka mbaruar mandati. Kuvendit po i vjen dita e fundit..., dhe qeveria nuk ka si rri pa Kuvend, pa drejtësi, pa zgjedhje...
Ky është kaosi; shtetin e ka ngrënë droga. Më parë nuk kishim ditur sie ha droga shtetin; ndërsa tani kaq të hapur sa jemi, kemi modelet më të qartë në gjithë botën.
Jo vetëm Kolumbia, që po citohet në media e në politikë- ndodhet nën pushtetin e drogës dhe të ushtrisë së klaneve, të klikave dhe grupimeve të drogës.
Ja shikoni Meksikën, sa ngjashmëri kemi. Nga kreu:
1.Presidenti Enrique Peña Nieto. Presidenti i Meksikës, i cili kërcënon edhe ISIS se ‘jam më brutal se ju’, ka vendosur që të vrasë në rrugë përdoruesit e drogës. Ka ardhur deri në këtë pikë për shkak se e ka ‘rrethuar’ droga. Media konservatore amerikane Breitbart këto ditë shkruante se Nieto është i pazoti që të ‘rebelojë’ kundër kartelit të drogës; i ka duart të lidhura- themi rëndom. Deri këtu mbërriti kryetari i Shtetit të Meksikës duke mbështetur shumë politikanë të lidhur me kartelin e drogës. Sepse në vitin 2012, zgjedhjet presidenciale të Pena Nieto u financuan nga karteli i drogës. Fondet u përdorën për të blerë votat në ‘cash’. Provat i solli gazetari i famshëm meksikan Carmen Aristegui...
Ja ku jemi sot në shtetin tonë të paralizuar. Opozita ka dalë në protestë për të shmangur modelin ‘Nieto’. Kryeministri i Republikës, Edi Rama, është provuar se ka një lidhje të ngushtë me drogën dhe kartelin e saj. Fillimisht pse suportoi kultivimin në mijëra parcela. Pastaj pse qeveria e tij është piketuar si faktor që e transporton dhe e shet drogën. Pastaj se nga vendet fqinje evropiane vijnë me avionë dhe marrin drogë. Pastaj pse në Kuvend ka prurë dhe ka mbrojtur anëtarët e kartelit të drogës dhe trafikut të qenieve njerëzore. Tani pritet që në zgjedhjet që vijnë të bëjë të njëjtën gjë si presidenti i Meksikës, Pena Nieto: Me paratë e kartelit të drogës të blejë votat në zgjedhje. Opozita po proteston bash për këtë.
- Tomas Yarrington, ka qenë guvernator në zonën Tamaulipas në Meksikë. Tani ndodhet në kërkim ndërkombëtar nga Departamenti i Drejtësisë në Shtetet e Bashkuara. Ai ka transportuar drogë në Amerikë, por shteti i tij, Meksika mashtroi dhe e mbajti në disa pozita shtetërore. Por të paktën ky tashmë është arrestuar në Itali dhe pritet ekstradimi... Pjesëtarët e kartelit të drogës në Shqipëri edhe pse janë shpallur në kërkim ndërkombëtar, qeveria i fsheh dhe i përdor për të kryer diversion ndaj opozitës , ndaj shtetit dhe sigurisë njerëzore.
- Eugenio Hernandez, është pjesëtar i kartelit të drogës, i kërkuar nga Drejtësia në Shtetet e Bashkuara. Por ndërsa në vendin e vet është shpallur i pastër, në Amerikë është në kërkim për krimin e dyfishtë të pastrimit të parave dhe mashtrim bankar. Sigurisht që paratë e “pastruara” vijnë nga karteli i drogës. Fenomeni është i njëjtë po aplikohet në Shqipëri. Militantë të qeverisë, që kanë kryer krime të njëjta në vendet evropiane, këtu janë zgjedhur kryetar Bashkie në distrikte; ose anëtarë të Parlamentit. Ndërsa në Europë janë shpallur “fajtorë” në krime, këtu janë të ‘pastër’.
Në Meksikë janë të paktën shtatë nga liderët e majës së shtetit që ndodhen në këto pozita kriminale me drogën. Përveç këtyre:
Javier Duarte, guvernator i Veracruz është nën akuzë për përvetësim të shumave të mëdha nga paratë publike. Por përsëri është pjesë e administratës së shtetit... Cesar Duarte Jaque- guvernator i
Chihuahua është aktualisht në kërkim në vendin e tij për përvetësim parash nga arka e shtetit. Por ndërkohë, pa asnjë pengesë hyn e del nga vendi i tij në misionin e kartelit të drogës. Gazetari i njohur meksikan Miroslava Breach ka zbuluar lidhjet e tij me Partinë Revolucionare Institucionale; por menjëherë gazetarin e vranë... Humberto Moreira- i cili në Shtetet e bashkuara ka gjurmët e gishtave si i përzierë në krime, në Meksikë po garon si anëtar i Kongresit nën flamurin e “Partisë së të Rinjve’.
A nuk shikoni sa ngjashmëri kemi me një vend ku droga e ka mbytur dhe ka asfiksuar shtetin?! A ka nevojë të gjejmë ngjashmëritë e ‘këtij’ këtu me ‘atë’ atje?!. Sigurisht, secili e bën lidhjen me emrin që ka në mendje si i njohur në krim dhe politikë.
Në Meksikë ka ardhur puna që shteti po gjuan për të vrarë në rrugë ‘përdoruesit e drogës’, por jo ‘kartelin e drogës’. Këtë nuk mund ta bëjë më shteti. Edhe këtu shteti nuk ka më institucione, mund të bëjë çfarëdo çmendurie, por jo të luftojë krimin.
* Qëndrimet e autorëve në rubrikën OP-ED nuk paraqesin domosdoshmërisht vijën editoriale të “Albanian Free Press”
