“Presidenti Ivanov mbetet në qëndrimin e shpallur para qytetarëve më 1 mars të këtij viti. Pengesat për dhënien e mandatit për formimin e qeverisë akoma nuk janë tejkaluar”, – thanë nga Kabineti i Presidentit.
Për LSDM-në, pengesa e vetme janë Ivanov dhe Gruevski. Partia e Zaevit nuk bën me dije nëse partitë që formojnë shumicën do të marrin iniciativë për thirrjen e Kuvendit dhe zgjedhjen e kreut të saj por paralajmërojnë vazhdim të konsultimeve mes palëve.
“Pengesat e vetme në këtë moment në Maqedoni janë pikërisht Gjorge Ivanov dhe Nikolla Gruevski. Ivanov duhet të ndërpresë krizën, sepse në këtë mënyrë mbron Gruevskin dhe udhëheqësit kriminelë nga zbatimi i vullnetit të shumicës së qytetarëve që të formohet një qeveri e re dhe reformuese. Sa më shpejt të japë mandatin, për të cilin nuk ka pengesa, aq më shpejt do të stabilizohet vendi. Ne paralajmëruam konsultime me partitë që përfaqësojnë shumicën parlamentare, që të vazhdohet séanca konstituive e Kuvendit – deklaroi Petre Shilegov, zëdhënësi i LSDM-së.
VMRO-DPMNE-ja vazhdon të dënojë ashpër marrëveshjen mes palëve për avancimin e gjuhës shqipe dhe zbatimin e disa kërkesave të tjera të palës shqiptare. Partia e Gruevskit, zgjidhjen e sheh te heqja dorë nga platforma ose zgjedhjet e parakohshme parlamentare.
“VMRO-DPMNE fton LSDM-në të heqë dorë nga platforma e Tiranës dhe realizimi i elementëve që përmban ajo. Nëse LSDM-ja e bën këtë, do t’i japim mbështetje Zoran Zaevit të formojë qeveri. Zgjidhje e dytë për daljen nga kriza, janë zgjedhjet e parakohshme parlamentare bashkë me ato lokalet”, - njoftuan nga VMRO-DPMNE. /e.a/afp.al/
